KA HMANGAIH TAWH SI A. Part - 1

(John 14:15; 21:18) “Mami, saw tlangval, engmah thiam nei lo, a bawk si, zei bawk si lo, sawrkat hnathawk pawh ni lo, mi rethei fa leh nghal, lirthei pawh a nei ve em ni ? Mi in hnuai luaha ni tin ei chawp zawnga nung ve ṭawk ṭawk lehnghal saw i duh a maw ? I a ta em ni le ? A ni thei lo, ṭhen nghal hmak rawh,”tiin a fanu chu a vin ṭhuai ṭhuai a. A fanu chuan, “Ka nu, i thlirna tlang aṭang chuan hmangaihtu nei thei lo khawpa rethei leh mawl pawh ni mah se, kei chuan a chhung lam nun ka en a, ka duh a ni; chuvangin, ṭhen leh thei ka ni tawh lo; KA HMANGAIH TAWH SI A, tawrh a ngaih leh ka tuar zel mai ang,”a ti a. . Tlangval hausa tak pakhatin chu nula chu a hmu tai ta tlat pek a. A sum leh pai te, thiamna te, nihna te, in leh lo te, ṭawngkam bungrua leh hausakna zawng zawng chu 407 truck tam takin a phur phei a, a han bem ṭan ta a. Mahse, chu nula rinawm tak chuan, “Hmangaih ber nei ta la, chu chuan rawn ṭhen chein mi dang neihsan ta thut che sela i rilru a na ang em ? Min hrethiam la, ka hmangaih ber rilru tihnat ka tum lo, KA HMANGAIH TAWH SI A, tiin a chhang a. . “Ka nu, Missionary ah ka kal dawn” “Mama, nang zawng i la naupang si, eng mah thiam i nei si lo, kal ve lo mai rawh. K.Ṭ.P-a inhman hi i tih theih tawk rawngbawlna a ni mai e,”tiin a nu chuan a chhang a. “Ka nu, khawvelah hian nang lo chu nu dang ka nei lo va. I ngaih dan chu zahawm hle mah se, min Chhandamtu, a hnathawh chhunzawm tura min kotu hi phatsan thei ka ni tawh lo. Min Hmangaihtu chu KA HMANGAIH TAWH SI A, ka kal a ngai tlat”. . ‘Ni tin kan ei khawpin chaw min pe ang che’tia dil ṭhin chhungkaw tan chuan Bible zir tura han kal chhuah mai chu thiltithei RINNA neih si loh chuan haw lehna kawng zawn nghal chuk chuk a awl hle. Pathian thu zir turin tu man min ti lo. Chawmtu tur ka zawng lo va, tu man “Ka chawm ang che,”pawh an ti lo. Min kotu chu KA HMANGAIH TAWH SI A, ka kal ta mai a ni. . An Lalpa thupek awiha, ringtu hmasate an inkhawm ṭhin ang khan, ka Lalpa min hmangaihna ka lo hre ta a. Amah faka, a thute zir tur leh Amah chu be turin Inkhawm a ngai tawh tlat. Ani chu KA HMANGAIH TAWH SI A. . Kristian inti si, Bible pawh ngaina lem lo; inkhawm dawn pawha Bible tel lova Hlabu keng duh zawk te, kar khata Bible vawi khat tal pawh chhiar mang lo, inkhawm dawnah chauh Bible mamawh, ban veleha a awmna chin hre tawh ngai lo chuan Bible neitu chu an hmangaih tawk lo a ni. Isua hmangaihtu chuan Bible a ngaina ang a, chhiar lovin a awm thei lo vang. Krista hmangaihtute tan hei bak hi ‘Hmangaih lehkhathawn’dang a awm lo ve. Kei zawng min Hmangaihtu lehkhathawn hi chhiar nuam ka ti a, mite’n chhiar lo mah se ka chhiar zel ang. Ani chu KA HMANGAIH TAWH SI A. . Hmangaih ber nena inbiak leh SMS inthawn velte hi tu nge hrehawm ti nagi ? Damchhung rei lo te atana hmangaihna der min hlana, khawvel hrehawmna hre thiam ve tawk leka hmangaihna der min hlantute nen zan khaw tairek thleng thlenga SMS inthawna, mut hun leh thawh hun pawh hre lo khawpa hmangaihte be peihte hian ni tin minit nga tal Lalpa kan be ṭhin ang em le ? . Naupang te ka nih lai aṭangin zing ṭawngṭai inkhawm ka kal ṭhin a. Zingah hma taka thova, min hmangaihtu ber be tura i-he lova Biak Ina ka kal ṭhin avangin inchhirna pakhat mah ka la nei lo. Zing thawh veleha ṭawngṭai hmasa lova mi dang han biak hmasak te hi ka hreh em em ṭhin. Ka biak chak ber chu Lalpa a ni a. Ani chu KA HMANGAIH TAWH SI A; chuvangin, ṭawngṭai a ngai tlat.