KA HMANGAIH TAWH SI A. Part - 2

(Part - 2, Sunday pual) (Jn 14:15; 21:18) . Mi tu pawh Pathian hmangaihnaah a awm chuan Kohhran programme a ngai pawimawh hmasa ṭhin. Zaikhawm an rawt maw ? Pulpit leh lam tuala a changtu ber ni awm taka bei nghektu ṭhenkhat chuan zaikhawm an peih tlat lo zu nia maw le ! Rawngbawltu, K.Ṭ.P, ȚKP, PYD leh Kohhran Hmeichhe hruaitu etc pawh kan bang bik lo. . A vawh leh lum vanga zai peih lo ringtu i nih vaih zawngin i la ngaihtuahawm viau ang. Aw, tlangval, i bialnu kha mi dang tel miah lova nangmah chauhva rim i chak ṭhin a ni lo’m ni ? Mi dang kal lo mah se, ka kal a ngai tlat. Min Hmangaihtu chu KA HMANGAIH TAWH SI A. . ‘Engkim in tih apaing Pathian ropuina tur hlirin ti rawh u,’ tih thu hi i hriat reng phawt chuan i kova tla rawngbawlnaah khan i phun i phun ka ring lo. Thingpui i lumin Isua i lumsakah inngai la, inkhawmpuia i kalin i Lalpa be tura kal i ni tih inhria la; mikhual i hmuahin Lalpa Isua hmuakah inngai la. Damlo i kanin Isua kanah inngai la, damlo i zawnin Isua zawnah inngai la, tichuan i lawmna chu Lalpa danah a ni ang a, i phunnawi tawh ngai lo vang. . ‘Zanin chu Committee ka peih lo tlat, hla ka zir peih lo tlat; vawiin chu ka hnatlang peih tlat lo,’ i ti ṭhin em ? Chatuan nunna i neih theih nana kum 3 zet Lal Isuan i rawng a bawlsak lai che khan vawi khat lek pawh a peih loh thu a sawi i hria em ? Kei zawng m,in Hmangaih bertu chu KA HMANGAIH TAWH SI A, phunnawi lovin ka kal leh phawt mai ang e. . Sadraka, Mesaka leh Abednegoa te chuan lal uain leh sa te aiah thlai hnah an ei zawk a. Lal chaw kha tui an tih loh vang ni lovin, Lalpa an hmangaih tak vangin an ei thei lo a ni zawk niin a lang. . Rawngbawltu pawimawh tak takte zingah pawh ruih theih thil chi hrang hrang, zuk leh hmuamte, Synod pawhin a duh lohte hi bansan phalo kan la awm cheu hi ! Zuk leh hmuam titute zingah tu nge 100%-a ṭha ti awm ? Chhiartu duh tak, hengte hi sim ṭha i ti em ? ‘Tu pawh thil ṭha tih tur hriaa ti si lo chu a tan sual a ni’ (Jak 4:17) ‘In thianghlim tur a ni, kei ka thianghlim si a,’ titu Lalpa chu KA HMANGAIH TAWH SI A, insum a ngai tlat. . Hrehawm tam tak tuara vanram lut tur kan ni a. Hrehawm a lo thlenin Lalpa laka kan rinawmna a lo lang ṭhin. Hmangaihte an damloh chuan zan pawh mu ṭha thei lovin hna pawh kan thawk thei ngai lo. Min Hmangaih bertu chuan Kraws-ah hrehawm a tuar a, chu hrehawmna chu ṭawmpui vein mi dangte tan hrehawm tuar ve a ngai tawh tlat. . Ka nu leh pate’n hrehawm tam tak tuara min lo enkawlna Lalpa’n mal a sawm a, heti thleng kal ve thei ka ni a. Lungchhe taka ka awm laiin, “Lalpa Isu, ka tan I hrehawm tawrh dante kha min hmuhtir leh rawh” tiin ka dil ṭhin. . Hrehawmna chuan chhelnaa hring a, chu chhelna chuan ka nun a la chhanhim dawn si a. Min Hmangaihtu chu KA HMANGAIH VE TAWH SI A, chuvangin, eng pawh ka chungah lo thleng se, hrehawm tawrh a ngai tlat. Hmangaih ber nena hrehawm tuar dun chu a changtu lo chuan a hlimawmzia leh a thlamuanthlakzia tu man an hre lo vang. . Kohhran leh khawtlangah nihna chanvo neih loh chuan sawiseltu party member kan ni duh fo. Chanvo nei sia hlen lo erawh chuan mi dang tuarna a thlen ṭhin. Nuin a chaw chhum a hmin hmain ‘Ka peih tawh lo,’ ti ta sela, a rawngbawlna a hlen loh avangin chhungkaw boruak a chhiat loh i ring em ? Krista chu KA HMANGAIH TAWH SI A, chuvangin Lalpa’n a Kohhrante kal tlanga tih tur min pek a piang lawm chunga tih zel a ngai tawh. . Lal Isua’n Petera hnenah, “I upat hunah i kutte i phar ang a, midangin an hrensak ang chia, i duh lohna lamah an kai ang che,”a ti a, Ka pian hmain Lal Isua’n rawng min lo bawlsak tawh a. Ka naupan laiin ka nu leh paten ka rawng min lo bawlsak tawh bawk a. Sunday School leh ni tin School-ah zirtirtute’n ka rawng min lo bawl sak tawh bawk a. . Tunah chuan rawngbawlsaka awm tawh lovin, rawngbawltuah ka awm ve ta a. Min Hmangaihtu tan kutte phar tawhin, Thlarau Thianghlim leh Kohhran hruaitute’n min hrensak tawh a, an duhna lamah min kai ta a nih hi. Min Hmangaihtu chu KA HMANGAIH TAWH SI A, chuvangin, ka duhna hmunah ni lovin an duhna hmunah midangte rawngbawlsak tura awm ve a ngai tlat tawh mai. . “Nangnin min hmangaih chuan ka thupekte chu in zawm ang,” titu chu KA HMANGAIH TAWH SI A, phunnawi a rem tawh lo va, hnung lam hawi a rem tawh hek lo. A sawi apiang tih a ngai ta. Eng pawh tawk dawn ila, min Hmangaihtu chu KA HMANGAIH TAWH SI A. . Chuvangin, mahni hrehawm pawisa lova, ni tin kraws pua, a kohna chhanga rawngbawlna hlena, thihna hneha nunna Lallukhum chang ngei turin kei chu KA HMANGAIH BER TAN KA INPE MAI A NI. Amen.