PATHIAN IN UIRE A HUA, MAHSE A SIM CHUAN A NGAIDAM THEI

Mi nupui uire, a ṭhenawm nupui uire chu, a uirepa leh a uirenu chu tihhlum ngei tur a ni. (Lev 20:10)

I uire tur a ni lo. (Deut 5:18)

Mi nu uiretu chuan hriatna a nei lo a ni, Ama nunna tiche tûr thil a ti a ni, (Thuf 6:32)

'I uire tur a ni lo,' an ti tih in hre tawh. Kei erawh chuan, tupawh ngaih chaka hmeichhe melh apiang chu, a thinlungah a uire tawh reng a ni tih ka hrilh a che u. (Mt 5:27-28)

Engavanga UIRE tih thumal hi Bible ah hian a tam em em nge ni ang ? Pathian in a huat em avangin leh a mite chu UIRE lo tura a duh vang niin a lang.

Kawppui nei tawh ten mi dang an va mut pui chuan UIRE an nia. Kawppui nei tawh mutpuitu pawh UIRE a ni. Sex hi Pathian in NUPA kara hman atana a siam a ni a. A hmang diktu tan Malsawmna, a hmang diklo tan erawh sual lian tak, Pathian huat zawng tak a ni thung.


Lalpan SEX a pe che a. A duh dan angin i hmang ṭhin em ? Lalpan SEX a pe che a, a siamna chhan ang ngeiin i hmang ṭhin em ? Hman dan tur diktaka hmangtute tan chuan SEX hi a mawi em em a, a ṭha a ni. A hmang dik lo te chungah erawh Lalpa a lawm ngai lova. A hrem ngei ngei ṭhin niin a lang.

Unau duhtak, i lo hmang sual tawh pawh a ni thei e. UIRE NU an man kha Lal Isuan engtin nge kal tir tak kha ? "Tin, ani chuan, "Lalpa, tuman mi chantir lo ve," a ti a. Tin, Isuan, "Kei pawhin thiam loh ka chantir lo va che; kal la, tun hnuah tisual leh tawh suh," a ti a. (Jn 8:11)

Unaute u, Lalpan uirena sual a hua a, a sima te erawh a lawm ṭhin. He UIREna bawihah hian i lo tang a nih chuan zanin aṭangin "Kal la, tun hnu ah tisual leh tawh suh" tiin Lal Isuan i hnenah thu a sawi a ni tih pawm la. Lalpa huat em em UIREna sual kal san turin thuthlukna i siam agam ang em ?

Lalpan ṭanpui che in chakna thar pe che rawh se.