KEIMAN KA CHAWLHTIR ANG CHE U - Isua (Mt 11:28)
Tehkhinthu an sawi ka hriaa. Mi tute emaw Sumdawng ho hian an bungrua phura ke a an kal mek laiin an hnung lam aṭangin Truck a rawn kala, an lo phar a. Truck chhungah chuan an lut ta a.
An kal tumna khua an thlen chuan an chhuk ta a. Driver ten an han hmuh chuan kawngtluanin an bungrua te kha an lo phur char char a lo nia. Hahdam takin an tum ram an phur thleng emaw Driver ten an tih laiin an ni Sumdawng ho chuan Truck hnunga chuan a hahthlak dan leh a hrehawm dan an sawi chamchi ta zawk a ni awm a !!!
Truck chhuatah khan an phurrit nghahna chang hria selang chuan hahdam takin an awm anga, hah miah lovin an tum ram an thleng mai tur kha a ni a. Truck khan an bungrua phursak kha a duh a, an phurrit zawng zawng amah (Truck) ah nghat vek turin a duh a. An phurrit te kha chhawk zangkai a tuma, mahse,, sumdawngho chuan an phurrit nghahna chang an hre si lova !!!
Eng phurrit nge keini RINGTU te hian phur ve le ? Eng phurrit nge ni tina kan PHUR hlawm le ? Thlarau bo phurrit nge, zu phurrit nge, ruihhloh phurrit nge, Tisa chakna sual phurrit nge, duhamna phurrit nge, huatna phurrit nge, itsikna phurrit nge, nupa kara buaina phurrit nge, inbumna phurrit nge, ngaihzawng phurrit nge ?
Eng ang phurrit pawh phurrin, mangangin, chauvin, beidawng hle ṭhin mah ila. Kan PHURRIT zawng zawng Amah ah (ISUA AH) innghahna chang kan hriat hun hunah kan phur chu a ZANG VE dawn a ni.
Sumdawng ho anga kan phur reng chuan mi'n 'MI A' min ti mai dawn a ni. Chuvangin, SAWMNA AW MAWI BER, Lal Isua sawmna hi ngai pawimawh ilangin.... HAWH U, NITINA KAN PHURRIT MIN PHURSAK FO ṬHINTU PATHIAN HNENAH ZANIN/VAWIIN HIAN KAN PHURRIT ZAWNG ZAWNG A KE BULAH I NGHAT ANG U.
Tichuan, Thlarau ah leh damchhung khawsakna tin rengah KRISTA CHUAN MIN LO CHAWLHTIR VE DAWN A NI.
Comments
Post a Comment