KAN BEISEI VANRAM

Mitthi kaihthawha an awm dawn loh chuan i eiin i in ang u hmiang, naktukah kan thi dawn alawm.
(I Kor 15:32)

Q1. Eng vangin nge kristian i ni ?
Ans. Vanram kai ka duh a.

Q2. Eng vangin nge Baptisma i chan ?
Ans. Vanram kai ka duh a.

Q3. Engvangin nge Isua i rin ?
Ans. Vanram kai ka duh a.

Kan beisei Vanram hi awm dawn lo ta se, Isua rin hian kawngro a su dawn lova, nitinna kan buaipui Lal Isua chanchin pawh hi dawt mai a ni dawn a ni.

Kan rin Isua hi a awma, a nunga, thil a titheih a, min chhandam turin a rinawm tawk bawk a ni. A awmna Vanram chu ringtuten kan beisei ber leh amah kan rinchhan ber niin a lang bawka.

Chu Vanram ngei mai chu thlen hlan kan nghakhlelh em ema, LALPA ngei pawh lo kal thuai thuai se tiin duhthu kan sam fo țhin ti ru ?

Chu hmun thlennan chuan kan "THIH" phawt a ngai a. Chhiartu duhtak, THI TURIN I IN BUATSAIH TAWH EM ?

Kan beisei ber Vanram a nih chuan kan chhungte an thih ni ah pawh lungngaia țah ai chuan thinlung takin kan in lawmpui tur a ni zawk dawn lawm ni ?

Kan in ngai a, kan in hmangaiha, kan in tla phallo. Mahse... thuneina chhete pawh kan nei si lova. Chuvangin, lungawi taka kan beisei ber Vanram kan thlir zawk van khualehtuite chuan kan tih tur niin a lang.

Kan hmangaih ten min kal san chuan kan ngaia, an sulhnu kan chhui a, lawmna tur aiin ṭahna tur kan hmu tama. Kan ṭap anga, kan ngai ve ang.

Chutihrual erawh chuan Ringtute chu a hnenah Lalpan a hruai tawh tih kan hriaa.... Chu chuan min hnem sela, Lal Davida ang khan, "Kei pawh ka la kal ve dawn" tiin Lalpa fakin, chawimawi i tum zawk ang u.

Thihna hi a "na" bik a awm lova, a "nep" bik a awm lo. A tuar thiam apiang tan a "nep" niin a langa, a tuar thiam lo apiang tan a "na" bik niin a lang mai a ni.

Tah chuan an leng e tlan sate,
Lei hring nun hi an ngai tawh lo;
Chatuan hlim tawp lohna ramah,
Inkhawmpui an țiak tawh ngai lo.