KEINI PAWH VANRAM AH KAN LA KAL VE DAWN

Nimahsela tuna chuan a thi ta si a, engah nge chaw ka nghei tawh ang? Ka ko kor leh thei dawn em ni? A hnênah keimah hi ka kal ang a, nimahsela ani zawng ka hneh a lo kir leh tawh lo vang," a ti a.
(2 Sam 12:23)

Tehkhin thu in bul țan ila. Nu pakhat chuan a fapa thihna chungchangah Pathian a dem fova, a fapa chu pe let leh turin a țawngțai fova. A tawpah chuan Pathianin tiang hian a chhang ta a.

I duh chu ka pe thei che. Mahse, ka pek hma che in he thil pakhat hi i tih ve a ngai. In tinah kal la, zawhna va zawt vek la. Nangni thihna in tawk tawh em ? In tuarna ve em ?

Thihna tawk miah lo chhungkua leh tuarna miah lo chhungkua pakhat tal i hmuh chuan i dil kha ka pe ang che..tiin.

Chu nu chuan In tin ah kalin mi te chu a va zawt kual taa. Thihna tawk loh leh tuarna lo chhungkua reng reng pakhat mah a hmuh chhuak zo ta lova. Hrilh haih takin a haw ta a. Chuta țang chuan Pathian hnenah a vui leh tawh ngai lo.

I nu leh pa te emaw, i unaute emaw, i kawppui emaw, i fate emaw an thih in i vui țhin em ? I hmangaihte i vuiliam khan Vanram khian nge i lung tilenga, thlanmual zawk in ?

He lei hi kan ramhlun tur a ni lo tiin kan sawi kan sawi a, kan Permanent Address Vanram a nih thu pawh kan sawi țhin a. Mi chhungkua ah thihna a lo thlen in Thlamuanna thu kan sawi thiam em em a.

Mahni chhungkua ah thihna a lo tjlen meuh erawh chuan Thlamuanna thu reng reng kan sawi thei ngai lova (?). Chutiang ang mi, ringtu inti kan ni ngat chuan ngaihtuah awm tak kan la ni ang.

Lal Davida ang a ringtu țha, a fapa kalna tur hre chiang em em mai ringtu kan ni ve em ? Kei chu maw, Vanram an kai ngei ang tih ka rin te an thi hian ka thinlung takin ka lawmpui țhin a nia.

Chutihrual erawh chuan hremhmun kal ngei ngei tura rin ten fam an chan chang in ka rilru hi a na a, a rum țhin.

Vanram khi keini Kristian ten kan Chatuan hmun tura kan Target ramhlun tur a ni chuan, chu hmuna kal thuai thuai hi kan chak tur a ni dawn lawm ni ?

Chuhmun kan kal thei na turin "#THIH a ngai a. Vanram kal nan Isua rin angai ang in, Vanram kal nan #THIH a ngai a. Chuvangin, mi an thi țhin a, keini pawh kan la thi ve dawn a ni.

Ka U leh ka Nu an thi ve tawh a. Ka u leh ka nu an thih avangin chunglam khi ka ngailo. Lal Isua Krista ka rin avangin, chu ram chuan ka lung min len țhin zawk a ni.

Ka Hmangaih Isua chenna khua, Vanram khian min hipa. Chu ramah chuan ka Nun khua a nuam tawh anga. Min Hmangaihtu chuan min lo kuangkuah anga, tah chuan, ka lei țah lai hi ka bang tawh ang.

Aw ringtu, i tan chuan thihna hi engmah a ni lo. I hmangaih Isua nen in in tawnna tura Pathian in a ruat a ni a. Vanram i kai ve theina tura, i zawh ngei ngei tur kawng, Lalpa siam a ni.

Thihna in a tih buai theih kristian nge i ni a, Thihna in a hneh theih loh Kristian ?