"LALPA KA THAWMHNAW TE MIN LO VEN SAK ANG CHE AW"

Coimbatore aṭangin Trichy, Tamil Nadu ah keimah chauvin Train in ka kal dawn a. Bag 2 leh bedding pakhat ka nei a. A lian in a rit hlawm bawk a. Train ticket ka nei sa lova, lak chawp tur a ni.

Coimbatore railway station chhungah chuan ka bag te chu ka phurh luta. Ṭhian ka nei lova, hmelhriat pawh an awm lo. Ka bag te a lian mai piah lamah an rit bawk avangin hmun khatah ka dah tawpa.

Train ticket lak ka ngai bawk si. Mi lah chu an tam bawk si, thui deuh in LINE a ngai dawn bawk si. Ka buai titi ta mai a. A tawpah chuan ṬHIAN RINAWM ISUA ka nei a lawm le tiin ka ṭawngṭai ta a.

"Lalpa, vawiin hian tumah ṭhian ka nei lova, min pui tu tur tumah hmelhriat pawh hetah hian ka nei lo. Trichy kalna tur Train Ticket lak ka ngai si a. Train ticket la tura ka va IN LINE chhungin nangin KA THAWMHNAW TE HI MIN LO VEN SAK ANG CHE" tiin ka dila.

Ka bag te chu railway station chhung hmun pakhatah chuan ka dah a, ka kalsan tawpa. "Ka ṭawngṭai tawh a, Lalpan min lo ven sak mai ang"tiin Ticket Counter lam chu ka pana, mi tam tak in line-na ah chuan ka va inline ve ta a.

Rei fe ka inline hnu chuan Ticket chu min pe taa, ka BAG dahna chu hmanhmawh takin ka va pana.... "Oh ! Thank you Jesus" tih pah in thinlungin lawmthu ka sawi mawlh mawlh a. Tichuan, ka chuanna tur Train dinna tur platform lam panin ka bag pathumte chu ka aka, ka phurh bawka.... Train ah chuan ka luta. Khawvel pian tir ata ka la kal ngai miah lo na khawpui pakhat Trichy lam pan chuan hmelhriat pakhat mah nei lovin Train ah chuan ka chuang ta a.

Abrahama angin RINNA chak neih loh mah ila, kan RIN VE phawt chuan kan hnena awm ve zel tura min tiamtu (promise tu) Lalpa chu Thlarauvin ka hnenah a awm ve zel a ni tih a tak takin ka hre leh ta a.

Kan mamawh min pek hi chu Lalpa hian harsa a lo ti reng reng lo. A hming ropuina tur a kan dilte min pek pawh hi harsa a ti lo. Kan harsatna sukiangtu (Problem solver) dik tak chu RINNAA ṬAWNGṬAINA hi niin a lang.

Chuvangin,....
I ropuina zawng zawng hmu turin,
Ka mit min tihmensak ang che.
Tangka leh rangkachak ai pawh in;
Ka tan chu chu a ṭha zawk e.

Khawvel leh sum zawng zawng a ral ang,
Ka Pathian thu a ral lovang (Halelluiah, Amen)
Chatuana Nunna min hriattir a;
Pathian leh Mihring Lal Isua.
(KHB 596)