PATHIANNI AH HNA KA THAWK THEI LO (Pathianni Serh chungchang)

"Pathian nen kan inkar a fel phawt chuan a tawk e" tih hi ka pawm dan leh vawiin thlenga ka la tih ṭhin a ni.

"Lalpan a rawngbawl tura min koh tak tak chuan RINNA IN ka kal anga, ka kawng zawh tur chu min siam chawp sak zel mai ang" tiin Pathian thu zir turin Coimbatore, Tamil Nadu ka pan a.

Ka kal hma in ka zirna turte, a kal kawngte ka zir chianga, tumah ka rawn lova, ka nu leh pate pawh ka rawn lo. Engkim a fel hunah ka chhungte ka hril a.

Tuman min khap lova, kut hnathawk a ei zawng ve mai chhungkua kan nih avangin thlakhat ah Rs. 200/- min rawn thawn thei chuan a tawk ang! Sahbawn leh toothpaste etc man tur ka ti a.

A chhan chu, min kohtu hi tunge a nih a ? A hna thawk chhunzawm tur hian min koh tak tak chuan MIN NGAIHTUAH MAI ANG tiin ka ring tawp mai a.

A takin Lalpa chet tir ka duh a, rintlak Pathian a nihna te an sawi fova, a rintlak zia chu ka mit ngei a hmuh ka duh bawk a. Min koh tak tak chuan mualpho in ka haw lovang ka ti a.

Abrahama Pathian, Jakoba Pathian leh Isaka Pathian, Mosia leh Joshua hnena ropui taka in lar/puang ṭhin Pathian kha min kohtu Pathian hi a nih chuan engvangin nge a thiltihtheih zia te min hmuh tir lo bik ang le ?tiin keimah leh keimah ka inzawt reng a.

Pathian thu ka zir duh chhan hi chhan chi hrang hrang hrang a awm a, a chhan zawng zawng erawh tunah kan sawi vek lovang.

Tichuan Hostel ah ka lut a, class te kan kal ṭan ve ta a. Pathianni zingkar inkhawm hma in kan Warden in ka room-mate te nen min rawn kova. Hna thawh lawk tur a awma, kan thawk ve mai a.

Inkhawm banah min rawn ko leh a. Ka ṭhiante chu ngawi rengin an kal a, an tih apiang chu an thawk mawlh mawlh a. Mahse, ka inthiam thei ngang loh avangin ti hian ka lo chhang a.

"Pathian ni ah hna ka thawk ngai lo, ni dangah hna thawh tur min pe ula, Pathian ni ah erawh hna ka thawk thei lo" tiin warden chu ka lo chhanga. Rei fe kan inhnial hnu chuan min kal san ta a. Chuta ṭang chuan Pathian Ni ah hna thawk turin min ti ngai tawh lo.

Kan Kristian pui vai ṭhenkhatte chuan "Inkhawm kan ban tawh chuan duh duh kan thawk thei tawh a lawm" tihna rilru an pu ṭhin niin ka hria a, chutiang ang rilru chu keinin kan pu ve thei si lo a !!!

Pathian ni ah min beisei anga hna ka thawh loh avang khan ka chungah tuman action an la lo. Lalpa duh zawnga kan nun chuan Lalpa'n min thawh sak zel ṭhin tih hi a takin ka hmu chiangta zel a....

Chuvangin, LALPA NEN KAN INKAR HI FEL PHAWT RAWH SE. A fel phawt chuan thinlung siamtu chuan mi thinlung hi a ti nem in, a ti sak mai ṭhin a.

Kan lamah Lalpa a ṭan phawt chuan tunge min do thei ang ? ti a Bible ah kan hmuh ang hian Lalpa ṭán tlaka kan NUN hi a ngai a, a ṭán tlaka a thu pek kan zawm leh Amah kan hmangaih tlat a phut bawk niin a lang.

A tawpna atan hei hi tarlan tel hram ka duh. "Mihringte phatsan leh hnawl ai chuan Pathianin a phatsan leh a hnawl nih hi ka hlau ber".

Lalpa tan ding la, i mamawh hunah I TAN LALPA CHU A RAWN DING ZEL MAI ANG.

Lalpa tan thawk la, I MAMAWH HUNAH I TAN A RAWN THAWK ZEL MAI ANG.