ṬAWNGṬAINA CHUAN ENGKIM A TIDANGLAM THEI

MI FEL ṬAWNGṬAINA CHUAN THIL NASA TAK A TI ṬHIN (Jak 5:16)

Khaw pakhata ka awm laiin KṬP ah in hmangin Zaipawl member ah ka in pe ve a. Thiam belh zel ka duh avangin hla zirna ah pawh rokhawlhna lian tham a awm lo chuan tel ve zel ka tum ṭhin a.

Vawikhat chu "Hla zir Camp" an rawta, Biak In bula Sunde sikul hall ah zanah hla kan zira, kan riak nghal a. Zingtin deuh thaw a Ṭawngṭai inkhawma kal ve ṭhin ka ni a, zing ṭawngṭai inkhawm tur chuan Biakin ah ka lut a. KṬP member mi dang 3 vel an inkhawm ve bawk a.

Zing ṭawngṭai inkhawm kan ban chuan Biak In hnung lamah kan ṭhiante chuan Exercise an lo laa. Ṭan hunah kan awm lo avangin ṭawngṭai inkhawma tel zawng chu a hmingin min hrema (tih ṭhin dan pangngai angin).

Min hrem zawh chuan, Conductor chuan (Asst Conductor ni ta in ka hria) Hla zir tura in Camp kan ni a, Hla zir chhung chuan zing ṭawngṭai inkhawm ah tumah kal lo ila, zing ṭawngṭai inkhawma kal zel tumte tan hla zirnaa tel a remchan dawn lo thu a rawn sawi a.

Zaipawl dan anga a hminga min hremte kha pawi ka ti lova. Ṭawngṭai inkhawm ka kal avanga hremna tawk kha ka ni a, ka rilru a na lova, Amaherawh chu, zing ṭawngṭai inkhawma kal ve ṭhinte, kal ve hrih lo tura a sawi khan min ti buai ta tlat mai a. Nilengin ka inngaihtuah a, tichuan thuthlukna chu ka siam fel ta a.

Lehkha ka ziaka, KṬP Committee member pakhat hnenah tlaiah ka pe a. Ka thu ziakte a chhan leh avang ka sawi vek bawka. Khua a thim ve leh ka mutbu chu ka han la a, hla zirna ah chuan ka kal ta lova.

A tuk zingkarah hma takin ka thova, ka tih ṭhin dan pangngai angin Biak in lam ka pana, zing ṭawngṭai inkhawmah chuan ka kal leh ta a.

Zing ṭawngṭai inkhawm kan ban chuan pawnah KṬP hruaitu pahnih velin min lo changa. Min lo kova, ka lehkha an hmuh thu te leh hmanhmawh taka Committee an ṭhut thu te leh Committee in "Dan Thar" a passed thute min lo hril a.

"I lehkha kha kan lo hmu a. nizan khan hla pawh zir rei lovin kan committee nghala. Kan conductor (te) pawh a in thiamlo hle a. tichuan, tiang hian thu kan pass ta a. "Naktuk zing aṭang chuan zaipawl member zawng zawng zing Ṭawngṭai Inkhawm ah kal vek tawh tur" tiin. (Halelluiah, amen)

Chuvangin, nang pawh haw tlang lovin hla zir ve nghal rawh" min lo ti a. "E khai, ava lawm awm dawn ve, Zing ṭawngṭai Inkhawm ah ka kal thei dawn chuan Hla pawh ka zir ve leh nghal ange" tiin ka zir ve nghal ta a.

A tuk zingah chuan Zaipawl member 95% vel chu zing ṭawngṭai inkhawm ah kan kal in ka hria.

Unau duhtak, Pathian hnena Ṭawngṭaina hian thil hi a ti thei a ni (Prayer can transform everything) tih hi a takin i tawng ve tawh em ?

He post in uar taka tarlan a tum chu, "ṬAWNGṬAINA CHHANG ṬHINTU PATHIAN CHUAN A HMING ROPUINA TURIN KAN ṬAWNGṬAINA A CHHANG ṬHINA. MI RILRU A TI DANGLAM THEI A NI" tih hi a ni.